Nina sa tuo nga parte it dughan ro naangkun it sambilog ka miyembro it Philippine Coast Guard nga naka-assign sa Carles Sub-station matapos raya nga mabuno it kaibahan sa inuman sa Brgy. Bancal, IloIlo ku Nobyembre 1.
Ro biktima hay ginkeaea nga si SN2 James Esmael Penalba it Tambo M. Kulit, Indang Cavite, 26 anyos.
Natabo ro insidente sa baeay it suspect nga si Gerome Salaber, 40 anyos.
Base sa impormasyon, naga-imnanay ro daywa kat may natabo nga indi pagkaintidihanay kaangut sa tourist permit nga ginaproseso segun ni Salaber.
Bangud dikara, bigla nga nagtindog ro suspect ag ginbuno si Penalba.
Sa presente, sa Barotac Viejo District Hospital si Penalba ag ginataw-an it nakaigo nga pagbuoeng samtang nag-surrender man sa Carles Police si Salaber./JIL B. LACSON
