Temporaryo nga ginpundo ro pediatric vaccination sa tunga it lima hasta 11 dag-on kuntra sa COVID-19 virus.
Naubos eun segun ro kabieogan nga 20,000 doses it reformulated Pfizer vaccine nga ginpadaea it Department of Health (DOH) sa probinsiya, raya ro naging pahayag ni Dr. Maria Socorro Colmenares Quiñon, Provincial Health Office (PHO) chief.
Makarang dominggo, magapadaea pa ro DOH it mga bakuna sa mga unga, pero basi kay Quiñon, uwa maw it ideya kung pila ka mga doses ro nakataeana nga mag-abot.
Raya hay igata-o bilang pangaywa nga dose sa mga unga para sa masunod nga round it andang vaccination.
Ginlunsar it PHO ro andang pediatric vaccination para sa lima hasta 11 dag-on ku Peb. 14./JIL B. LACSON
