GIPANIGURO sa Davao City Covid-19 Task Force nga dili limitado alang sa mga bakunadong Dabawenyo ang pagsaulog sa Kadayawan Festival karong tuiga nga gilaraw himoong pisikal.
Sumala kang Dr. Michelle Schlosser, tigpamaba sa Task Force, hangtud karong mga orasa wala giobliga sa national government ug sa city government ang tanan nga magpabakuna busa dili kini mahimong babag sa pagsalmot sa selebrasyon.
Hinoon moepekto pa gihapon ang implementasyon sa Executive Order 11 o pagtanggal sa tanang Covid-19 restrictions gawas na lamang sa mandatory nga pagsoot og face masks sa Kadayawan.
Ang nasangpit nga lakang pagsupurta matud pa sa tinguha sa local nga panggamhanan nga makarekober ang ekonomiya sa dakbayan pinaagi sa in-person nga selebrasyon.
Kahibaluang una nang gibutyag ni Tourism Operations Office (CTOO) head Generose Tecson nga target karong tuiga ang in-person celebration sa Kadayawan Festival sa umaabot bulan sa Agosto diin pipila sa mga highlight events mao ang Indak-Indak sa Kadalanan, Pamulak sa Kadayawan ug uban pa.BNFM-DAVAO
