Mokabat sa kapin P35 milyon ang gibilin nga danyos sa nahitabong sunog sa cold storage facility sa usa ka kompanya nga nahimutang sa Purok 1-A, Brgy. Bunawan, Davao City sa miaging Lunes.
Base sa impormasyon gikan sa Bunawan Fire Station, dunay usa ka patayng lawas ang narekober sa fire scene kagahapong adlawa sa gihimo nga retrieval operation sa mga personahe sa Bureau of Fire.
Ang cadaver nga nakaplagan ipailawum sa DNA test ug autopsy aron mailhan ang pagkatawo sa biktima.
Dugang sa report nga dunay usa ka chinese national ang missing apan dili pa makumpirma kung kini ba ang patayng lawas nga narekober sulod sa storage facility.
Tanang mga makina, kagamitan ug produkto ang naugdaw sa kalayo nga gitoohang nagsumikad sa welding flux o mga tinagsip sa pagwelding nga nahulog sa foam sa maong warehouse ug paspas nga nikatag sa tibook gambalay.
Luwas na usab ang usa ka Gang Lin, empleyado sa maong kumpanya.
Una niini niabot sa 4th alarm ang sunog sa SLK Corporation nga gipanag-iyahan sa usa ka Mr. Kim Lin, usa ka kumpanya nga naga-export og frozen products sama sa Tuna. BNFM-DAVAO
