KALIBO, AKLAN—Masobra Php 63 million pesos do standard drug value it mga nakumpiskang illegal drugs sa ginpatigayon nga drug operations it mga kapulisan sa bilog nga Western Visayas.
Base sa operational accomplishment report it Police Regional Office (PRO) 6, umpisa January-June 2021, 1,169 do naarestong mga drug personalities kaeakip eon kara do mga pushers, users ag iba pang nag-eapas sa RA 9165 (Comprehensive Dangerous Drugs Act of 2002) kung siin 2,780.80 gramo it marijuana ag 8,986.675 gramo it shabu do kinumpiska it otoridad nga may drug value nga Php 63,447,429.56.
Samtang, nagaabot man sa Php 1,048,885.00 do kwartang nakumpiska it mga pulis sa kampanya kontra sa illegal gambiling sa bilog nga rehiyon ag may una nga ginpatigayon nga 1,206 operations ag 3,514 do mga naaresto.
Nauna eon nga ginpahayag it pamunuan it PRO 6 nga may pandemiya man ukon owa, hay padayon do andang pagpatigayon it nagkasari-saring operasyon eabi eon sa mas ginpabaskog nga kampanya kontra sa droga, loose firearms, illegal nga sugae, pagdakop sa mga wanted person ag mga eakot sa illegal fishing ag illegal logging. // SHERRY ANNE REUNIR-VIDAL
