Gihagit ni Davao City Mayor Inday Sara Duterte-Carpio ang bag ong nilingkod nga commander sa Task Force Davao nga pantayan o labwan pa ang mga tunob sa iyang gihulipan nga si Col. Consolito Yecla.
Sumala sa mayor, angay pangandaman sa bag ong lingkod nga si Col. Darren Comia ang lapad nga katungdanan ug obligasyon aron mamintinar ang kahapsay, kalinaw ug siguridad sa Davaoenos nga gibilin ni Yecla.
Gitumbok sa mayor ang hisgotanang terorismo aron masiguro ug makab ot ang zero terrorism incidents.
Gihagit ni Mayor Inday si Comia nga magpanday kini ug kaugalingong ligasiya alang sa kahapsay ug kalinaw sa Davao.
Pipila sa mga tahas nga gisangon sa mayor sa bag-ong kumander ang zero terrorism, pagpadayon sa ligasiya ni Yecla ug ang ikatulo ang pagmugna ug kaugalingong ligasiya alang sa mga Davaoenos.
Kahinumduman, si Yecla nisirbisyo isip TF Commander sukad 2019 hangtod 2021 samtang si Comia nisirbisyo kanhi sa Davao isip kumander sa 16th IB sa kabukirang bahin sa Paquibato District.
Nagtoo ang mayor nga nitugpa sa maayong mga kamot ang kapalaran sa TF pinaagi sa gipakitang disiplina ug kaayo sa bag ong commander.
Gipasalig sa alkalde nga full force ang Davao City aron suportahan ang iyang liderato.
