IPATUMAN sa GenSan ang ‘No wrong door’ policy program o pagtugot sa residente sa ubang lugar nga magpa-booster shot sa siyudad. Matud ni Dr. Rochelle Oco, City Health Officer ug incident commander sa Local Inter- Agency Task Force on Covid 19 (IATF) pasabot kung taga- Sarangani Province ka o Davao mahimo kang moadto sa mga vaccination site sa dakbayan aron makaangkon sa booster shot.
Gihingusgan ni Dr. Oco nga wala gisarado sa GenSan ang pultahan alang sa gikan sa ubang lugar. Ang polisiya ang una nang gi-adopt sa nasud. Samtang sa ulahing datus sa GenSan, naa na sa 778,917 ang naturukan sa bakuna batok sa COVId 19 sa siyudad. Asa mokabat na sa 376,991 ang nakadawat sa unang dose sa COVID 19 vaccines o 80.91% sa target population nga 465,938.
Nakatala usab og naa sa 365,308 katao ang dakbayan nga fully vaccinated gikan sa target eligible population. Una nang, gibutyag ni Dr. Oco nga naangkon na sa GenSan ang population protection batok sa virus. I Richel Gubalani
