TANGGONG sa selda sa Bula Police Station ang usa ka motorista human narekober sa kapulisan sa gituohang iligal nga droga sa iyang posisyon.
Giila ang dinakpan nga si Kevin John Argente Lerio, 25-anyos, ulitawo, taga Barangay San Isidro, GenSan. Nakumpiska niya ang naa sa duha ka gramo sa gituohang shabu nga nagkantidad og P13, 600 ug digital weighing scale.
Matud ni Major Ian Bagot, hepe sa presinto alas-1:36 dihang nagpahigayon sila og checkpoint sa Mateo road, Barangay Lagao. Dihang miagi si Lerio sakay sa motorsiklo, gisita kini sa pulis tungod sa wala pagsul-ob og helmet.
Inay sumala pa nga mohunong mipadagan kini sa motor ug didto na gigukod sa kapulisan, nabangga kini sa concrete fence, natumba ang motor nga miresulta sa pagkaangkon niini og samad sa ulo. Sa pagkatumba sa motorsiklo, didto na nangahulog ang pakete sa gituohang shabu. Wala na usab mihatag og pamahayag si Lerio.
Samtang, gipasaka na sa kapulisan ang kasong dunay kalabutan sa gidiling droga sa piskalya. I Richel Gubalani
