Moabot sa P4.8 million kantidad sa mga smuggled “ukay-ukay” ang naharang sa Port of Davao ug gipangguba sa unang bahin sa 2021.
Sumala kang Bureau of Customs (BOC)-Davao district collector Atty. Erastus Sandino B. Austria, ang nasangpit nga mga butang nagdala og bahad sa panglawas sa mga local buyers ilabi na nga wala kini miagi sa saktong inspeksyon.
Kinahanglan matud pa nga i-condemned ang maong mga konrabando sanglit nalakip kini sa mga items nga gibawal ang importation subay sa Republic Act (RA) No. 4653 niadtong 1966.
Gawas sa ukay-ukay, moabot usab sa P5.716 million kantidad sa sigarilyo; P447,614 medicines ug cosmetics; P547,788.95 electronics; ug P77,568.83 general merchandise ang naharang sa Collection District 12 ilawum sa BOC-Davao.
Samtang gitino sa opisyal nga pipila sa mga nasabat nga items nga dunay “commercial value”, maahimong ipailawum sa public auction aron makakuha og kita o revenue ang gobyerno gawas na lamang sa mga items nga gibawal ang importation. BNFM-DAVAO
