NAKAMUGNA og kaguliyang ang pagguba sa mga payag sa mga claimant sa usa ka pribadong yuta nga nahimutang sa Purok Nangka sakop sa Brangay Conel, General Santos City buntag sa adlaw nga Sabado, Marso 5, 2022.
Subay sa talaan sa San Isidro PNP alas 7sa buntag nagpatala ang usa ka nagpangalang Hussein Abas AKmad nga sumala pa nga giguba ang ilang balay sa Purok Nangka, Conel sa gi-alegar nga mga 50 ka mga tawo nga sumala pa sinugo sa tulo ka mga tawo nga miyembro sa pamilya Mascardo.
Aduna usab laing tawag nga nadawat ang San Isidro PNP nga nagpahibalo sa kaguliyang, subay sa talaan sa presento 4 nagrespondi silang PLt. Balofiños ug imbestigador aron mag-imbestiga sa nahitabo, samtang nagrespondi usab ang ubang unit sa kapulisan alang sa kahapsay ug kalinaw, ang resulta nasuta nga adunay konplikto sa yuta tali sa duh aka pamilya mao nga gitugyan na ngadto sa barangay alang sa hustong disposasyon.
Sumala kay Fatima Alfonso gisulod sila og daghang mga tawo unya gipangguba ang walo nila ka mga payag, wala daw sila mahimo kay tulo lang sila ka babaye nga naa sa balay mao nga wala sila nakapugong.
Naa daw nagpabuto og armas apan wala sila kaila sa tawo nga pagpabuto, anaa usab daw silay papelis nga ilaha ang yuta ug anaa pa ang lubnganan sa ilang apohan sa lugar.
Sumala usab kay Anwar Adjat nga sinugo sa pamilya Mascardo ang nagguba sa ilang mga balay sa lugar, nagduda usab sila nga kampi ang barangay sa ilang kaatbang kay adunay kagawad nga Mascardo, wala daw silay plano mohawa sa lugar, ilang gitukod balik ang ilang mga balay, plano usab nila modangop na sa korte.
Sa bahin ni Kagawad Mascardo wala daw kini labot sa nahitabo adlaw nga Sabado, samtang usa sa miyembro sa ilang pamilya ang niatubang sa Brigada ug nagsulti nga gikan na sila sa barangay apan wala sila nahusay, sila ang unang gireklamo, gihusay sila sa barangay kuyog ang taga Muslim Affairs, may certificate to file action na ang mga claimant apan wala pa nidangop sa korte aron mahukman ang pagpanag-iya sa yuta.
Ang klaro daw nga estorya napalit sa ilang katigulangan ang 42 ektaryas may deed of sale, nabalhin ang pangalan sa titulo unya gipakural ug adunay gwardiya gikan sa usa ka agency unya may karatola nga Private Property ‘unauthorized person not allowed.’
Nidangop daw sila sa abugado human nga adunay natala nga unang kaguliyang og kawat sa lubi ug aduna silay demand letter ug notice to vacate nga gisilbi gikan sa abugado, kon mamugos daw ang claimants sa pag-abante luwas sa ilang unang nakasabotan sa barangay gwardiya na ang bahala sa paghimo sa ilang obligasyon samtang naa sa ilang post.
Sa pahayag sa chairperson sa peace and order sa Barangay Conel nga si Kagawad Sande Acunia, una na nag-abot sa barangay ang duha ka partido sa milabay nga tuig unya may certificate to file action na apan pipila ka bulan ang milabay ang laing partido ang niabot sa barangay ug nagreklamo apan wala nisipot ang pikas partido.
Nakarespondi daw sila sa hitabo apan nadismaya usab sila kay gipalayas sila ug ang ilang mga tanod ug gibaharan, gumikan sa pagduda sa pikas partido nga dapig sila sa pamilya Mascardo gumikan sa usa ka konsehal nga nag-apelyido og Mascardo nga naga-abstain man sa mao nga isyu.
Panawagan ni Kagawad Cuniado sa naga claim sa yuta nga dalhon nalang unta sa korte ang reklamo aron mahusay nga malinawon basis a papelis kon kinsa ang klaro nga tag-iya sa yuta aron dili usab maguba ang ilang peace and order situation.
Naghangyo na usab sila sa city LGU ug sa pulis nga butangan sila og naka- standby nga pwersa aron nga makarespondi dayon kon adunay kaguliyang nga aduna nay paggamit og armas.
Samtang sa bahin sa mga lomulopyo nga anaa sa lugar sumala kay Sweety, sayo sa buntag nahitabo ang kaguliyang ug nakuyawan usab sila kay aduna silay nadungog nga boto, sa iyang nadungog dili lang gikan sa usa ka lugar ang boto, tungod niini wala na sila niduol sa mga payag nga gipangguba, pagka hapon nibalik usab og tukod ang mga occupants ug daghan na sila sa lugar daplin sa sapa. I Ver Diazon
