GINALAUMAN na sa mga tindera sa panaderya nga motaas ang presyo sa tinapay gumikan sa pagtaas sa presyo sa mantika, harina ug asukal.
Sa pagpanubay sa Brigada sa pipila ka tinapayan sa sulod sa merkado publiko adunay nagmahal samtang aduna usab nagpabilin pa sa ilang naandang presyo.
Sumala kay Maymay, usa ka tindera nga gisugdan na sa pagkwenta sa ilang amo ang ilang gastos sa pagpalit og mga sangkap sama sa harina, asukal ug mantika gumikan sa pag-usbaw sa presyo matag kilo.
Sa ilang pwesto nagpabilin pa sa P50 pesos ang usa ka putos sa cream bread, ang 20 ka buok pandesal P28 pesos, ang ensaymada P15 pesos ug ang hopia P7 pesos ang usa.
Sa laing pwesto sumala ni Lydia nga ang unang niusbaw sa ilang baligya nga tinapay mao ang cream bread sugod sa bulan sa Desyembre gikan sa P30 pesos nahimo na nga P35 pesos ang usa ka putos gumikan nitaas na usab ang presyo sa mga sangkap.
Samtang sa karon nga usbaw lauman usab nga subli sila nga mopasaka sa ilang presyo sa tinapay.
Ang ilaha daw ginagamit sa tinapay special nga harina samtang sa kinilo nga asukal nga pula anaa karon sa P45 pesos matag kilo samtang ang asukal nga puti anaa sa P68 pesos ang kilo. I Ver Diazon
