Mga nabakunahang pulis sa Western Visayas, nagaabot eon sa masobra siyete mil

KALIBO,AKLAN—Masobra siyete mil eon nga mga pulis sa Western Visayas do nabakunahan.

Sandig sa datos it Police Regional Office (PRO) 6, nagaabot sa 7,691 PNP personnel do nabakunahan kung siin 5,403 kara hay fully vaccinated ag do 2,288 man hay nakabaton eon it andang 1^st dose.

Suno man kay Police Brigadier General Rolando Miranda, regional director it PRO 6, target nandang maabot do 100% vaccinated status sa mga kapulisan ag pagataw-an it prayoridad do mga nakabantay sa border control points.

Ginpasaeamatan man kara do National government nga gintaw-an it importansya do pagpabakuna sa mga pulis nga nagaserbeng mga frontliners.

Nasayuran nga ku nagtaliwan nga adlaw hay nagpatigayon it vaccination roll out sa PRO 6 headquarters matapos nga nag-abot do 8,000 doses it AstraZeneca halin sa National government pinaagi sa Department of Health.

Do PNP hay una sa idaeom it A4 category base sa order of priority it pagpabakuna sa nasyon. // SHERRY ANNE REUNIR-VIDAL

BNFM Kalibo