SUBLING nagareklamo ang mga miyembro sa Philippinewide Anti Smoking Operations for Health kun PWASOH Gensan gumikan nahuman na ang ikapito nga bulan sa 2021 sugod bulan sa Enero wala pa sila nakadawat sa ilang ginahulat nga incentive ug honorarium gikan sa local government unit sa Gensan.
Miaging adlaw nakadawat og tawag ang complaint desk sa 89.5 Brigada News FM Gensan gikan sa grupo sa PWASOH nga naa sila sa atbang sa panimalay ni Mayor Ronnel Rivera kay mag follow-up sa ilang 20 porsyento nga bahin sa mga multa gikan sa nakasupak sa balaud batok sa pagpanigarilyo ug sa ilang ginahandom nga tag upat ka libo nga honorarium.
Sumala sa usa ka team leader nga si Tresisio Herda wala sila atubanga sa mayor ang sulti daw sa security guard natulog pa ang Mayor unya aduna kini mahinungdanon nga programa nga adtuan mao nga nanguli sila sa ilang panimalay.
Gidugang ni Tresiso nga wala silay laing tumong kondili ang makilouy sa Mayor kay luoy na daw sila kaayo kay wala pa gayod silay nadawat bisan piso unya risgo usab ang ilang trabaho kay ang uban sa ilang isyuhan og citation ticket isog kaayo.
Kaniadtong Hunyo pa daw sila gisaaran sa incharge sa Mayor’s office nga si Kevin Sienes kalabot sa ilang dawatunon isip suhol sa ilang pagka- deputized enforcers sa syudad.
Samtang naghatag pagpaklaro si Executive Assistant III Jose Kevin Sienes kalabot sa isyu, sumala ni Sienes nga sa una nakaproseso na siya sa incentive sa mga miyembro sa PWASOH ug walay problema apan karon nibalik balik ang mga papelis tungod sa daghang rekositos nga ginapangayo sa City Accounting ug sa City Budget Office unya wala nagasulti daan kung unsa ang requirements nga kinahanglan nga Marso pa daw siya nagsugod sa proseso.
Ang dugang rason ni Sienes usa sa naka-apekto sa proseso mao ang COVID-19 ang iyang pagka-kwarantina ug ang work from home scheme sa city hall.
Ang sigurado daw nga madawat sa mga Anti Smoking Enforcers mao ang 20 percent share nila sa mga penalties kay ang honorarium nga tag P4,000 pesos matag bulan bisan kon aduna nay ordinansa kinahanglan pa moagi sa budgetting sa Sanggunian kay ang unod sa mga supplemental budgets naadto sa Anti Covid Response ug sa bakuna.
Paabuton nalang daw sa mga PWASOH ang ilang insentibo kay nagpatabang na siya sa taga Accounting aron mapaspasan pa.
Ang tubag usab sa labaw sa City Budget nga kon adunay sulat pagtugot sa Mayor sa ihatag nga honorarium sa mga enforcers wala matud pay problema kanila. ( Ever Diazon)
File Photo
