NAKAABOT sa 379 ka registrants ang naserbisyuhan sa taga Comelec Gensan sa pinaka-unang mall registration nga nagsugod hapit na alas 10 sa buntag hantud pasado alas 5 sa hapon.
Sa kumpermasyon ni Election Officer 4 Anwar Paidumama mas maayo ang sa mall kay mas lapad ug hamugaway alang sa mga registrants kaysa sa ilang opisina lang sa barangay hall sa West nga gamay lang ang ilang maserbisyuhan kay gamay ang lugar.
Samtang aduna usab nagreklamo kay wala naserbisyuhan kay naabtan na sa oras nga gi-limit sa taga Comelec, tungod niini nagahangyo si Paidumama sa mga barangay nga anaa sa layo sa sentro nga mas maayo kon didto nalang sila maghulat sa sattelite registration sa ilang barangay aron dili kaayo magdasok sa mall.
Gidugang ni Paidumama nga ang ilang paagi First Come First Serve ug ang priority sa mall registration ang taga Barangay City Heights, North, South, East, West, Bula, Calumpang, adlaw nga Huwebis hangtud Sabado moadto na usab sila sa sattelite registration.
Nagapasalamat usab si Paidumama sa management sa Robinsons Mall nga nagatabang ang mga gwardiya sa paghan-ay sa pila sa registrants aron masunod ang social distancing. ( Ever Diazon)
