Banga, Aklan – Sa kustodiya eon makarun it Banga Municipal Police Station ro mga baril nga ginapanag-iyahan ni Sangguniang Panlalawigan Member Nemesio Neron nga expired ro lisensya.
Ku Hulyo 23 hay nagdesisyon ro misis ni SP Neron nga si ABC President Alma Neron it Barangay Sigcay, Banga nga i-turn over ro daywa ka high-powered rifles, sangka carbine rifle, ag sangka caliber .38 revolver para sa safekeeping.
Daywa sa nasambit nga baril hay ginapanag-iyahan ni SP Neron nga sangka retired PNP member ag former Provincial Director it Aklan Police Provincial Office.
Ro nasambit nga mga armas hay igabalik sa tag-ana kung makapag presenta eon it nagakaigu nga dokumento.
Ginkalipay man it Banga MPS ro pagkooperar ni SP Neron ag ku anang misis sa programa it PNP nga “Tokhang Kontra Armas Luthang”. / ANN DESLENE SALAZAR
