Nakahunong na sa lock up cell sang Tapaz PNP ang isa ka mekaniko matapos nadakpan sa ginkasa nga drug buy-bust operation sa Brgy. Switch, Tapaz, Capiz takna 1:30 kahapon sang Lunes, Oktubre 23.
Ginkilala ang nadakpan kay alyas “Tubol”, 26-anyos kag residente sang Brgy. Daan Banwa, Tapaz.
Narekober sa iya paghinakop kag kontrol ang tatlo ka sachets sang ginasuspetsahan shabu lakip na ang nabakal sang police poseur buyer kag P1,500 nga buy bust money.
Ginabanta nagabug-at sang 3 gramos ang nakumpiskar nga iligal nga droga kag nagabalor sang P20,400.
Magapangatubang ini sang kaso nga paglapas sa RA 9165 ukon Comprehensive Dangerous Drugs Act of 2002.
Ang nasambit nga operasyon ang ginpatigayon sang gintingub nga pwersa sang Capiz-PPDEU kag Cluster SDET nga ginabug-usan sang Tapaz MPS (Lead Unit), Dumalag MPS kag Jamindan MPS. | Judy Ann Juare
