Nagpabalhag sa Roxas City PNP ang isa ka lalaki matapos nasumbagan sa Arnaldo Blvd, Roxas City takna alas 7:30 kagab-i sang Dominggo, Oktubre 22.
Ginkilala ang nagreklamo kay alyas Chil, 31-anyos, residente sang Brgy. Tiza, Roxas City.
Samtang ang ginatudlo sini nga suspek amo si alyas Liam, yara sa legal nga pang-edaron kag residente sang Brgy. Lawaan.
Sandig sa ginpabalhag sang biktima, nagahulat siya sang iya service sa atubang sang dako nga mall sa may bahin sa Arnaldo Blvd sining syudad.
Ginapahayag nga hinali nalang ini ginpalapitan sang suspetsado kag ginsumbag sang makapila ka beses sa nawong rason nga nag-angkon ini sang pilas kag gaob.
Ginpakamaayo nalang sang biktima nga ipa-record sa kapulisan ang natabo kag gin-refer naman ini sa Brgy. Baybay agud didto magaatubangay ang magtimbang nga bahin. | Judy Ann Juare
