Dead on arrival sa ospital ang isa ka babayi samtang padayon naman nga ginabulong sa ospital ang live-in partner sini matapos ginpangluthang sa Brgy. Bongbongan, Maayon, Capiz.
Ginkilala ang mga biktima nga sanday alyas Gloria, 36-anyos kag alyas Joe, 25-anyos lunsay mga mamumugon.
Samtang ang ginatudlo suspek amo si alyas Boy, 30-anyos, isa ka mangunguma kag residente man sang nasambit nga lugar.
Sandig sa impormasyon nagikan sa Maayon Municipal Police Station, samtang yara ang mga biktima sa sulod sang ila puluy-an, hinali lang nag-abot ang suspek nga pakaisa man sang biktima nga lalaki.
Nag-angkon ang mga ini sang pinagbinaisay kun sa diin nagbunot sang indi matumod nga armas-luthang ang suspek kag ginpangluthang ang mag-live in partner.
Bangud sa natabo, pilas sa natuo nga tiyan ang naagom sang mga biktima nga madasig naman ginpadangat sang ila himata sa Bailan District Hospital, apang si alyas Gloria ang gindeklara sang doktor nga dead on arrival.
Gin-transfer naman sa Capiz Emmanuel Hospital si alyas Joe para sa nagakaigo nga pagbulong.
Sa karon, at-large sa gihapon ang suspek matapos nakapalagyo pagkatapos sang krimen nga iya nakumiter.
Daan nga hiligut-anon ang ginalantaw nga motibo sang mga kapulisan sa natabo nga insidente. | Judy Ann Juare
