Ginreklamo sang isa ka kagawad ang isa ka media practitioner bangud sa pagbalita sang sala nga impormasyon kun sa diin gin-ulamid ang pangalan sang iya bata may kaangtanan sa pagpatay sang ido sa Brgy. Blasco, Pilar, Capiz.
Suno kay Ernie Dela Torre, 52-anyos, nahuy-an ang ila pamilya kag tuman nga naapektuhan ang iya bata nga si Ermin Dela Torre, 24-anyos, former SK Chairman sang nasambit nga lugar.
Ginapahayag nga sang Mayo 20, nakita sang iya bata ang balita nga ginsulat ni Felipe Celino kag gin-post sa facebook kun sa diin gingamit ang picture sini kag pangalan nga amo ang nagpatay sa ido nga nagviral sa social media.
Nahibaluan nga madamo ang nag-bash sa iya bata bangud sa sala nga balita.
Luyag ni Dela Torre nga magpangayo sang pasaylo si Celino bangud sa kahuy-anan nga gintuga sini sa iya pamilya.
Bukas naman ang Brigada News FM Roxas sa natungdan nga maghatag sang paathag sa nasambit nga isyu. | Judy Ann Juare
