KUNG mahal ang mabuhi, gikaingong mas mahal ang mamatay.
Tungod daghan ang mangutang mahatagan lang og maayong lubong ang minahal sa kinabuhi nga mitaliwan.
Apan dunay usab pipila ang nangandam na sa pagkamatay sa miyembro sa pamilya pinaagi pagtigum o pagkuha og plan.
Nakita sa mga financial advisor ang pagsipa sa funeral services gikan 3% hangtud 5% matag tuig.
Nangutana ang Brigada News FM-GenSan pipila ka life plan companies ug sementeryo sa presyo sa ilang serbisyo.
Ang St. Peters metal caskets nagkantidad og P120, 000 apan kung dunay life plan mahimong mag-monthly og P2, 480 sulod sa lima katuig.
Samtang ang wood casket nagkantidad og P43, 400 ug dunay monthly nga P825.
Lakip sa St. Peter package ang package full cremation service, urn, ug tulo kaadlaw viewing service sa ilang mortuary chapels.
Sa Monte Cielo Eternal Gardens sa Barangay Mabuhay, GenSan magdula sa P75, 000 ang presyo sa pagpalubong.
Lakip niini ang lot price nga nagdula sa P52, 800 ug interment service nga naa sa P21, 500 samtang P35, 000 ang regular price cremation.
Matud ni Phma Ana Rosa Manguramas, General Manager sa Monte Ceilo dunay usab silang ginatanyag nga life plan.
Sa Antonio C. Acharo Memorial Park (ACAMP) sa Barangay Fatima ang usa sa dako nga pampublikong sam-ang sa GenSan.
Naa sa P3, 000 ang gasto sa pagpalubong base sa ordinansa sa siyudad ug base sa sanitation code ibalhin ang patay’ng lawas sa bone chamber.
Apan dunay luna sa ACAMP nga nagkantidad og P75, 000 aron himoong museleo sa mga buot magpahimo.
Gawas sa mga documentary requirements, mogastos pa sa bulak, pagkaon ug sanina sa namatay ug kini nakadepende kung unsa ka simple o kaengrande ang buot sa pamilya sa ilang memorial services.
Samtang dili madala sa kamatayon ang bahandi, makita ang ebedensiya sa paagi sa pagpalubong sa adunahan ug pobre.(Richel Gubalani)
