KALIBO, AKLAN—Ginaeauman nga mas maabong bakuna do magaabot sa probinsya it Aklan makarung buean it Setyembre.
Suno sa provincial government, target nga mabakunahan do 6,000 katawo kada adlaw sa mga vaccination site sa probinsya sa oras nga mas maabo eon do bakuna.
Nauna eon nga nag-apela si Aklan Governor Florencio Miraflores kay National Task Force Against Covid-19 chief implementer Secretary Carlito Galvez, Jr., nga mataw-an it kadugangang doses it vaccine eabi ag may 22 kumpirmadong kaso eon it Delta variant sa probinsya.
Kaangot kara, ginahinyo man it gobernador sa mga LGU’s nga mag set-up it mas maabong vaccination sites ag vaccinations team ag engganyuhon do mga non-medical workers kapareho it mga manugturo ag government employees nga mangin mga volunteers sa vaccination sites.
As of September 01, 2021, do probinsya it Aklan, hay may unang 11,767 nga kabilugan nga kaso it COVID-19 halin nga nag-umpisa do pandemiya, may 10,904 total recoveries ag nakalista man it 298 COVID-19 related deaths. // SHERRY ANNE REUNIR-VIDAL
