Pilason ang isa ka mangunguma matapos ginlabo sang panday sa Barangay San Vicente, Jamindan, Capiz takna alas 6:00 kahapon sang aga, Miyerkules, Agosto 30.
Ginkilala ang biktima kay Jonefer Garbosa, 44-anyos samtang ang suspek amo si Antonio Ortega, 58-anyos, lunsay mga residente sang nasambit nga lugar.
Sandig sa imbestigasyon sang Jamindan Municipal Police Station, nagpadulong ang biktima sa balay sang suspek kun sa diin nag-angkon ang mga ini sang mainit nga argumento.
Ginapahayag nga ginlabo sang suspek ang biktima sa magkatuhay nga parte sang lawas gamit ang talibong nga may 27 ½ pulgada ang kahabaon.
Madasig naman nga nagresponde sa lugar ang Jamindan-MDRRMO kag gindala sa Mambusao District Hospital ang biktima para sa nagakaigo nga pagbulong.
Boluntaryo naman nga nagsungka ang suspek sa ila Barangay Kapitan nga si Paulino Miranda kag gin-turn over siya sa Jamindan PNP para sa nagakaigo nga disposisyon.
Daan nga hiligut-anon ang ginalantaw nga motibo sa nasambit nga insidente. | Judy Ann Juare
