Pilason ang isa ka lalaki matapos aksidente nga bumunggo sa kasugata nga salakyan ang iya ginamaneho nga motorsiklo sa Barangay Cagay, Roxas City.
Ginkilala ang biktima kay Rolly Edada, 46 anyos, residente sang Sitio Puntod, Barangay Dinginan sining syudad.
Sandig sa imbestigasyon sang Roxas Component City Police Station, nagapasulod na kuntani sa garahe ang salakyan nga ginamaneho ni Darwin Juanillo, 26 anyos, nga may pasahero nga sanday Wilfredo Juanillo, 69 anyos, kag Catherine Juanillo, 58 anyos, sang hinali lang bumunggo sa natuo nga porsyon sang salakyan ang motorsiklo nga ginamaneho ni Edada.
Bangud sa natabo, nag-awas sa motorsiklo si Edada kag lumampos sa karsada.
Madasig naman ini nga ginpadangat sa ospital para sa nagakaigo nga pagbulong. Ginapahayag nga yara sa impluwensya sang makahulubog nga ilimnon ang biktima sang natabo ang aksidente. | Judy Ann Juare
