Nisunod si Mandaue Mayor Jonas Cortes sa pagresign sa Partido Demokratiko Filipino – Lakas ng Bayan kon PDP-Laban karung Miyerkules.
Sa resignation letter nga gi-address ngadto kang PDP-Laban President Rep. Jose Alvarez sa Palawan’s 2nd District, si Cortes niingon nga ang iyang desisyon naggumikan sa iyang tinguha nga ipadayon ang panaghiusa ubos ni Cebu Governor Gwendolyn Garcia ug ipadayon ang Mandaue ubos sa One Cebu.
Dugang pa ni Cortes nga isip mayor iyang prayoridad ang pagpahiuyon sa mga inisyatiba nga nagpasiugda ug nagserbisyo sa kaayohan sa komunidad.
Gipasalamatan usab niya ang PDP-Laban sa mga oportunidad ug suporta nga gihatag niini. Si Cortes nahimong miyembro political party sukad sa 2019.
Ang PDP-Laban mao ruling party nga gipangulohan ni kanhi Presidente Rodrigo Duterte.
Si Gobernador Garcia ni-resign usab isip miyembro sa PDP-Laban niadtong Martes, Mayo 28.
Gitumbok ni Garcia ang panagbingkil nila ni suspended Cebu City Mayor Michael Rama nga maoy hinungdan sa iyang desisyon. Sa iyang suwat, si Garcia niingon nga ang reklamo nga gisang-at ni Rama batok kaniya sa Office of the President maoy nakaaghat kaniya sa pag-resign sa partido.
