PATAY ang managtiayon human gidaro sa naghaguros nga mini-bus de pasaheroan ang motorsiklo sa mga biktima pasado alas 11 kagahapon sa buntag atubangan sa Apo Cement, Tinaan, dakbayan sa Naga.
Ang mga namatay giila nga sila si Perelyn Dosdos, 40 anyos ug ang bana niini nga si Julian Dosdos, 40, usa ka security guard, taga Brgy. Capitol Site, Cebu City.
Naangol usab sa maong aksidente si Severino Boro, hingkod ang panuigon taga Brgy. Balungag, lungsud sa San Fernando, driver sa JRK BUS CCE-599 nga gipanag-iya sa Southern transport.
Ang mga biktima padulong unta nga mopauli sa dakbayan sa Sugbu gikan nangaligo sa Guanzon resort sa naasoyng dakbayan.
Mihunong sila kay gipa-agi sa traffic aid ang trailer Truck, dihang naghaguros sa ilang likod ang bus nga padulong sa dakbayan sa Sugbu.
Si Police Staff Sgt. Jonathan Largo, sa Naga Police Station nagkanayon nga napiit usab ang lawas bus driver gumikan sa ka kusog sa impact.
Ang mga biktima, nalagpot og napasok usab atol sa aksidente nga maoy hinungdan sa ilang kamatayon.
