Pilas sa ibabaw nga bahin kang dughan kag busong ang naagum ni Edwin Eloro, 56 anyos, matapos nga dya ang ginbuno kang anang kaimaw sa irimnan nga si Ben Bonifacio, 53 anyos, lunsay mga mangunguma kag residente kang Brgy. Cubay Sermon, Sibalom kang Agosto 16, las-9:00 sa gabi-i.
Suno sa imbestigasyon kang Sibalom Municipal Police Station, samtang naga inum-inum ang biktima kag ang suspek, may nagtuhaw nga indi pag-intindihanay sa andang tunga sa diin dya ang nangin kabangdanan nga ginbuno kang suspek ang biktima.
Gilayon nga gindara kang nagresponde nga MDRRMO Personnel ang biktima sa Ramon Maza Sr. Memorial District Hospital para sa nagakaigo nga pagbulong samtang ginbitbit naman kang mga Brgy. Tanod ang suspek kag ginturn-over sa kapulisan.
Ang narecover naman nga patarum nga gingamit sa krimen ang nagalabug kang 8 inches halin sa punta paadto sa karaptan kag wara kang tagub.
Nagapadayon naman sa kadya ang imbestigasyon tuhoy sa insidente.
