Gindara sa Culasi District Hospital sanday Merlyn Magsipoc, 33 anyos, kasado, sangka OFW, kag si Christopher Magluyan, 49 anyos, kasado, kag lunsay mga residente kang Brgy. Bita, Culasi matapos nga sanda ang ginbuno ni Romer Glen Magluyan, 36 anyos, Ricemill truck driver, kag residente naman kang Brgy. Concepcion, Belison, las-7:00 sa gabi-i, Agosto 16 sa Brgy. Bita.
Suno sa kapulisan, nagpaadto ang suspek sa balay ni Merlyn agud mag-istorya kundaad tuhoy sa andang estado kang relasyon, apang ginpahalin ni Merlyn si Romer bangud dya ang sa idalum kang impluwensya kang makahurubug nga irimnon.
Apisar nga ginpangabay ni Merlyn si Romer nga maghalin, nagsulod ang suspek sa balay kang biktima kag ginbuno sa anang likod.
Gintinguhaan naman ni Christopher nga magtambag sa amo nga insidente apang ginbuno man dya kang suspetsado kang makapira ka beses nga na-igo sa nagkalain lain nga bahin kang anang lawas.
Nag kumugay pa ang darwa asta sa ma agaw ni Christopher ang kutsilyo ang ginbuno man ang suspek sa anang likod.
Lunsay gintugruan kang pagbulong ang darwa ka biktima sa Culasi District Hospital samtang ginsaylo naman sa Angel Salazar Memorial District Hospital ang suspek.
Wara naman narecover ang kutsilyo nga gingamit sa krimen kag sa kadya nagapadayon pa ang imbestigasyon.
