DAKO ang kalipay sa labaw sa Public Transport Alliance of Gensan kun PTAG kay adunay nisulod nga insentibo gikan sa gobyerno gumikan sa ilang serbisyo atol sa pandemya.
Sa kumpermasyon ni PTAG Chairperson Robert Cang adunay mga insentibo nga nisulod sa GCash account sa mga driver sa modern transportation gikan sa Luzon, Visayas ug Mindanao.
Giklaro ni Cang nga ang nisulod insentibo ug dili pa katong payout sa service contracting ug sa Libreng Sakay apan dako gihapon ang iyang kalipay gumikan sa milabay nga semana nakadawat daw kini og dili maayong mga pulong gikan sa mga driver ug sa ilang mga asawa nga dugay nga naghulat sa bayad sa serbisyo sa ilang mga bana gikan sa programa nga gitanyag sa gobyerno.
Gidugang ni Cang nga gitubag na sa Ginoo ang ilang pag-ampo ug may paglaum na nga ma-release usab ang uban pang payouts nga ilang ginalauman, ang bugtong rason lang daw gayod mao nga nihupas na ang Bayanihan 2 ug nabalik sa general fund ang pondo unya subli na usab nga giproseso aron mahatag ang bayad sa mga coop ug sa mga individual nga drivers.
Malaumon usab si Cang nga sa dili madugay madawat na nila ang payout sa service contracting ug Libreng Sakay gumikan nagsaad ang taga LTFRB nga mahatag na kini sa dili madugay.
Sa dugang kumpermasyon ni Cang ang nadawat sa mga driver gabei sa adlaw nga Lunes adunay kantidad P7,000 ug aduna usab tag P25,000 pesos.
Kahibaluan nga nag-alanganin sa pagdawat sa ikaduhang hugna sa Libreng Sakay ang pipila ka nga coop ug mga drivers gumikan wala pa sila naka-payout sa unang hugna sa programa. ( Ever Diazon)
