LEGAZPI CITY – Puminakol na sa labi PHP30,000 an kantidad kan mga pigpareserbang burak sa Daraga para sa papaabot na Undas.
Segun kay Ruth Espinas, Presidente kan Daraga Flowers and Ornaments Vendor Association, an nasambit na kantidad para sa pigbibilog nin mga arrangements, bundles asin ugwa man nin mga nag-wholesale.
Kada aldaw antes an undas, piglalaoman su boot ninda na madugangan man an presyo kan mga burak.
Alagad ngunyan, mantenidong nasa ababa pa an presyo kan mga ini, kaya pig-eenganyar an publiko na magpareserba na nganing dae na maabutan kan grabeng paglangkaw nin presyo asin ipipick-up na sana sa Nobyembre 1.
Sa presente, an produkto nindang dakol an nagbabakal iyo an Rados na nag-aabot sa presyong PHP550 hasta PHP600 kada bugkos, mantang sa saindang listahan kan presyo, presenteng nasa PHP50 pesos an kada pidaso kan rose, carnation, gerbera; PHP75 an chrysanthemum; PHP1,000 an kada bundle kan anthurium, PHP150 an kada pidaso nin sunflower; PHP350 an stargazer; PHP500 an kada sarong dosena nin orchids asin malaysian mums; PHP150 kada pidaso kan gladiolus/gladiola mantang PHP250 an kada kilo nin aster.
