KABANKALAN CITY, Negros Occidental — Isa ka gina-alegar miyembro sang New Poeple’s Army ang napatay sa engkwentro batok sa tropa sang 79th Infantry Battalion, sa Sitio Manaysay, Barangay Cambayobo, banwa sang Calatrava, tinalikdan nga adlaw sang Miyerkules, Mayo 22.
Sa interview sang Brigada News FM Kabankalan Kay Lieutenant Dan Carlo Samoza, civil military operations officer sang 79th Infantry Battalion, natabo ang engkwentruhanay matapos nga nagsugat-anay ang magkatuhay nga grupo, samtang naga-patigayon ang pulis kag militar sang joint-military operations sa nasambit nga lugar.
Suno pa kay Samoza, pito ka mga gina-alegar NPA ang na engkwentro sang tropa nga yara sa idalum sang Northern Negros Front (NNF), ang isa sa lima ka guerilla fronts sa probinsya nga gina-kunsiderar sang gobyerno nga nabungkag na.
Indi pa mapa-guwa sang militar ang pangalan sang napatay bangud gina-hulat pa ang pahanugot gikan sa pamilya, nga residente man sang nasambitan nga lugar.
Narekober Naman sa encounter site ang isa ka M16 rifle with live ammunition, hand grenade, magazines sang M14, magazine sang AK47, personal nga kagamitan kag iban pa nga subversibo nga dokumento.
Ang engkwentro sa Northern Negros ang nagluntad isa ka adlaw matapos magluntad man ang isa ka engkwentro sa banwa sang Moises Padilla sa Central Negros. *
Read: NPA, patay sa engkwentro sa Moises Padilla; M16 kag magazines narekober! — 62IB