KABANKALAN CITY, Negros Occidental — Isa ka ka gina-suspetsuhan miyembro sang New People’s Army (NPA) ang napatay sa gina-alegar engkwentro batok sa mga militar sa Barangay Quintin Remo, banwa sang Moises Padilla, adlaw sang Martes, Mayo 21.
Pahayag ni Lieutenant Mary Liza Joy De Guzman, civil military operations officer sang 62nd Infantry Battalion, duwa ka gina-alegar engkwentro ang nagluntad sa nasambit nga barangay. Una nga pag-engkwentruhanay natabo pasado las-7 sang aga sa Sitio Inangaw sa amo man nga barangay, batok sa pito ka armado, nga naglawig sang 10 ka minutos.
Samtang, ang ika duwa naman nga engkwentro ang nagluntad las-8:30 sang aga, batok sa lima naman ka gina-alegar NPA sa sitio Sak-Sak, sa amo man gihapon nga barangay.
Dugang pa ni De Guzman, nag resulta ang duwa ka engkwentruhanay sa pagkapatay ni Richard Dela Pena, isa ka gina-alegar NPA sa idalum sang Central Negros Front 1 (CN1), ang isa sa lima ka larangang guerilla sa probinsya nga gina-konsederar sang militar nga dismantled ukon nabungkag na.
Narekober sa encounter site ang isa ka M16, tatlo ka magazines, isa ka bandolier kag iban pa nga subversibo nga mga dokumento.
Suno sa militar, si Dela Pena ang gina-alegar imbolbado sa pag-patay kay Albert Navaro Goles alias Tongkay, sang Abril 24, isa sa walo nga gin-patay sang NPA. Kag ini man ang ginatudlo nga upod ni Marivic Ebarle alias Ivan, isa man ka gina-suspetsuhan NPA nga napatay sa isa ka engkwentro sang Hulyo 20, 2023 sa Sitio Kawayanan, Barangay Montilla, sa amo man nga banwa.*