KABANKALAN CITY, Negros Occidental — Ginpanginwala sang 3rd Infantry Division ang alegasyon nga may natukiban ang isa nila ka line battalion sa Negros Occidental, nga isa ka employedo sang gobyerno nga gina-alegar naga hatag suporta sa New People’s Army.
Sa interview sang Brigada News FM-Kabankalan Kay 3rd Infantry Division public information office head Lieutenant Colonel J-Jay Javines, wala sang may nabaton ang iya opisina nga impormasyon nga may yara sang politiko ukon indibidwal nga naga ubra sa gobyerno, kag naga hatag suporta sa NPA sa Negros.
Ang nasambit nga alegasyon ang nagguwa matapos gin-published sang isa ka Bacolod-based media ang impormasyon nga gina-quote si Lieutenant Dan Carlos Samoza, civil military operations officer sang 79th Infantry Battalion, nga naka base sa syudad sang Sagay, halos 200 kilometros Norte sang Kabankalan.
Personal naman nga nag pakig-angot si Samoza sa Brigada News FM-Kabankalan, agud klaruhon nga indi matuod ang alegasyon kag posible nga na “misquote” lang ang iya pahayag sang isa ka waragwagan.
Samtang, gin-klaro man ni Javines nga hugot ang suporta sang mga lideres sang nagkalian-lain nga syudad kag banwa sang Negros Occidental, sa ila pagpalab-ot sang mga serbisyo sang gobyerno sa mga kabukiran nga ila gina-kunsidirar nga “conflict-affected communities.”