-Reymund Titong
KABANKALAN CITY, Negros Occidental — Nakaagi na nga naluthangan ang 21-anyos nga si Cedric Jaro antis ini ginpatay sang wala pa makilal-an nga suspetsado sa Purok 6, Barangay Bantayan, syudad sang Kabankalan, pasado las-2 sang kaagahon, adlaw sang Miyerkules, Hulyo 10.
Pahayag ni Bantayan kagawad Raffi John Dalanon, apat kabulan na ang nakaligad naluthangan man sa iya bilas si Cedric kag na kibyasan ang iya tiil, sa alegasyon nga may personal nga aligot-gut ini sa biktima, apang nag-ayuhay ang magtimbang nga bahin matapos ang insidente.
Samtang, suno pa sa kagawad, ang pagpatay kay Cedric, ang una nga kaso sang pagpatay sa nasambit nga lugar.
Sa piyak nga bahin, para kay Estrelluta Fernandez, purok chairman sang lugar kun diin gin-patay ang biktima, mabuot nga bata si Jaro kag nakibot man ini sa pagpatay diri. Wala naman may naka kita sa suspetsado sa pagpatay bangud sang kahadlok kag maulanon nga panahon, dugang pa ni Fernandez.
Sa inisyal nga imbestigasyon sang kapulisan, gina-alegar may kaangtanan sa druga ang pagpatay sa biktima. Sa karun, nagapadayon pa ang imbestigasyon sang mga kapulisan.*
