NAALARMA ang opisyal sa GenSan sa padayong pagduhaduha sa pipila ka senior citizens sa pagpabakuna batok Covid-19.
Matud ni Dr. Rochelle Oco, labaw sa City Health Office (CHO) hagit kanila ang pagbakuna sa A2 priority group o senior citizens.
Kini human nasuta nga ang maong grupo ang labing dali nga madutlan sa gitawag nga ‘severe’ infection sa virus. Apan ang ‘misinformation’ sa bakuna ang gitudlo sa Department of Health (DOH) 12 nga rason sa pagduhaduha sa mga senior citizens.
Asa pipila ang nagtuo nga mamatay sila kung mabakunahan samtang dunay uban nga nagtuong ‘anti- christ’ ang bakuna. Sa datus sa siyudad, naa pa lang sa 14,698 kinatibuk-ang senior citizens ang ‘fully vaccinated’ o naa sa 41% sa 35,000 nga target.
Naa usab sa 14,187 ang maong priority group ang nakadawat na sa unang dose ug sagad gibakuna kanila mao ang Sinovsc vaccine. Sa kinatibuk-an, 223,173 vaccine doses sa bakuna ang nagamit na sa GenSan, 98,318 ang fully vaccinated samtang 124,855 ang nahulat sa ikaduhang dose. ( Richel Gubalani)
