KALIBO, AKLAN—Ginpaagi sa facebook messages do transaksyon agud nga makabaligya it illegal nga droga.
Raya do natukiban it mga operatiba it Aklan Provincial Drug Enforcement Unit (PDEU) sa kaso it sangka 17 anyos nga si John Moises Ellorig alias “Mosi” nga nadakpan ku nagtaliwan nga adlaw it Sabado sa ginpatigayon nga drug buy bust operation sa Brgy. Poblacion, Numancia, Aklan.
Suno kay Lt. Col. Frensy Andrade it PDEU Aklan, do nasambit nga suspect hay gin-obrang digital do anang illegal trade activities sa anang mga kliyente sa mga banwa it Kalibo, Numancia ag Makato makarung may pandemiya.
Gin-ako man sigon it suspek nga 16 anyos pa eang raya kat nag-umpisang maggamit it marijuana.
Kung madumduman, gin-aresto si Ellorig matapos magbaligya it daywang sachets it shabu kabaylo it P4,000 nga marked money sa sangka police poseur buyer ag kadugangang ap-at nga sachet it illegal nga droga do nabuoe kana sa ginpatigayon nga body search.
Samtang, nasayuran nga do tatay it suspek hay naaresto man dahil sa pagbaligya it droga sa buy bust operation sa Brgy. Aliputos, Numancia ku Enero 2019. // SHERRY ANNE REUNIR-VIDAL
