ANAA pa lamang sa 60 porsyento ang face to face nga klase sa mga pampublikong tulunghaan sa Gensan sukad nga kini ang gibalik human nga mihapak ang pandemya sa tibuok kalibutan.
Kini ang gikumpirma ni Gensan DepEd School Division Supt. RomMel Flores tungod kay ginatan-aw ang kahandaan sa matag tulunghaan gikan sa gihimong ebalwasyon pinaagi sa ginatawag nga school safety assessment tools.
Gipaklaro ni Flores nga kon makapasar sa ebalwasyon ang eskwelahan gilayon kining iduso ngadto sa iyang buhatan alang sa balidasyon ug mokuha na kini og suporta sa barangay, lokal nga IATF ug pagtugot sa ginikanan nga moapil sa nahisgotan nga matang sa pagklase ang iyang anak.
Nasayran nga pinaagi usab sa nahisgotan nga opisyal nga kon sa pampublikong tulunghaan sa Gensan may 60 porsyento na ang nagapahigayon og face to face nga klase apan sa pribado adunay tulo lang nga tunghaan ang nagapahigayon niini nga mao ang Quantum Academy, Notre Dame of Dadiangas Espina Campus ug Notre Dame of Lagao Campus. I Danny Casi
