Iginiit ni dating senador at Justice secretary Leila de Lima na dapat gumawa ng ‘proactive stance’ ang Department of Justice at ang ilan pang ahensya laban sa mga Chinese criminal syndicates.
Ito ay kasunod ng kumpirmasyon ng National Bureau of Investigation (NBI) na nag-match ang fingerprints ni Bamban, Tarlac Mayor Alice Guo, at ng isang ‘Guo Hua Ping.’
Ani de Lima, dapat magpatupad na rin ang bansa ng immigration laws laban sa naturang mga sindikato para matigil na ang ginagawa nilang mga iligal na aktibidad.
Binigyang-diin ng dating mambabatas – national security na ang nakataya rito.
Naniniwala naman ito na sapat ang batas sa immigration para habulin ang mga sindikatong Chinese.
Ang kailangan lang aniya ay gamitin at ipatupad ito nang tapat at masigasig.
