-Daina Gerona
KABANKALAN CITY, Negros Occidental — Matam-is nga mga yuhom ang suksok ang kapin 81 ka mga benipisyaryo sang Dualtech Scholars, sa probinsiya sang Negros Occidental.
Ini bangud nga magasugod na ang ila nga training sa kurso nga Electromechanics Technology Course sa Dualtech Center Foundation Inc. sa Calamba, Laguna sa sulod sang kapin duha ka tuig.
Base sa interview nga ginpatigayon sang Brigada Kabankalan sa isa sa mga scholar nga si Rylle Selado, iya ini ginakabig nga daku nga oportunidad agud nga makatapos sa pag-eskwela.
Nangin prayoridad sang amo nga programa ang mga out-of-school youth ukon ining mga estudyante nga wala makatapos sa pag-eskwela bangud sang kapigaduhon, nakatapos sang Senior High School, Alternative Learning System ukon ALS kag mga benipisyaryo sang indigent family kag solo parents.
Dugang pa, yara lamang sa anum ka bulan ang ila nga pag-eskwela ukon ang classromm-based setting kag sila ang magatrabaho sa nagkalain-lain nga kompanya sa sulod sang 18 ka bulan para sa ila nga On-the-job training (OJT).
Palayag sang gobernador sang probinsiya Eugenio Bong Lacson nga libre ang tanan nila nga mga galastuhan pati na ang mga plete, pagkaon, tulugan, tuition kag iban pa buot silingon wala sila sang pagagastuhon bisan piso sa amo nga programa.*
