BICOL – PIGHIHIDALI na ngunyan kan Department of Social Welfare and Development o DSWD-Bicol an saindang ginigibong pag-update sa database kan mga tios na namamanwaan sa rehiyon.
Sa sarong intrivista ki Marygizelle Mesa, tagapagtaram kan DSWD-Bicol, maabot sa singkwentang encoding staff an nakatutok na ngunyan sa pag encode kan maabot sa 177,783 household assessment forms (HAFs).
Base ngani sa operations management report system data, 141,031 o 76.04% kan kabilugan na bilang kan mga forms an encoded asin verified na sa rehiyon.
Paliwanag pa ni Mesa, an bagong database na ini na resulta soboot kan Listahanan 3 program an piglalaoman na maipapaluwas na sa enot na quarter kan taon dos mil bente dos kasabay kan national asin regional launch na aatendiran kun saen iimbitaran an mga private asin public stakeholders na makisumaro sa data sharing.
Maagi pa soboot kaya an mga encoding asin verification activities sa higot na checking asin validation antes mai-endorso an mga HAFs para Proxy Means Test o PMT processing.
An PMT an sarong statistical model na piggagamit sa pagkarkulo kan income kan sarong pamilya base sa mga indicators siring kan access sa basic services asin facilities.
Sa huri, pigcierto kaini sa pagpapadagos kan Listahanan activities an higot na maipasusunod an mga health protocols siring kan facemasks, physical distancing, asin proper hygiene urog na ngunyan na nagpapadagos an huma kan covid-19 asin mga variants kaini.
