Nadisgrasya na nakuhaan pa og kapin dos milyones nga kantidad sa droga ang usa ka drayber nga nalambigit sa vehicular accident nga miresulta sa pagkaangol sa walo pa ka indibidwal sa national highway sa Km. 78, Brgy. Dolo, Bansalan, Davao del Sur alas 2:30 sa hapon kaganiha.
Nalambigit sa aksidente ang Suzuki Dzire GL AMT sedan dunay plate no. MAO 1083 gimaneho sa usa ka Jose Palma Morales II residente sa 64 Bolton Isla Brgy 76-A, Bucana, Davao City.
Samtang ang na-engkwentro niini mao ang Honda CRV nga gimaneho ni Arnel O. Grumo, nagpuyo sa Old Airport, Panacan, Davao City sakay ang pito ka pahinante nga giilang sila si Gerlie J. Gaduyon, 40-anyos; Rexelyn G. Grumo, 12-anyos; Jesus Dexter P. Jarliga 11-anyos, Jeshane P. Jarliga 3-anyos; Jackelyn L. Jarliga 33-anyos; Jesierey L. Jarliga, 43 -anyos nga parehong residente sa Sasa Davao City.
Sa report sa Bansalan Municipal Police Station Traffic Investigation Section, gikan Cotabato City ug pauli na dinhi sa syudad ang Suzuki Sedan ni Morales samtang ang Honda CRV ni Grumo padulong sa Cotabato nga dereksyon.
Apan pag-abot sa Km. 78 kalit mitipas sa pikas linya si Morales hinungdan nga mibagga kini sa Honda CRV resulta sa head on collision ug pagkaangol sa mga sakay nga pulos gipangdala sa Viacrusis Hospital.
Nagkatag usab sa dalan dool sa sakyanan ni Morales ang mga pakete sa gikatahapang iligal nga droga hinungdan giutingkay pag-ayo sa miresponding mga pulis ang iyang kotse.
Ubay-ubay pa ka putos sa droga ang nakumpiska nga mokantidad og P2,250,000.00. nga gilangkuban sa usa ka Jumbo size, 23 ka Large ug tulo ka medium size sachet sa gitoohang shabu nga giindorso na sa Provincial Crime Laboratory Office alang sa eksaminasyon. Kasong paglapas sa RA 9165 kon Comprehensive Dangerous Drugs Act of 2002 ang naghulat kang Morales kung positibo nga shabu ang nakuha gikan sa iyang posisyon samtang ang walo nga naangol padayong gitambalan. BNFM-DAVAO
