Masobra 700 job vacancies ro nagahueat sa mga naga-usoy it trabaho sa face-to-face anniversary job fair it Department of Labor and Employment (DOLE) Rehiyon 6 sa SM City sa Mandurriao makarang adlaw, Disyembre 8.
Base kay John Mandario, information officer it DOLE-6, 543 nga mga lokal nga trabaho ag 206 trabaho sa ibang nasyun nga gintanyag it taeatapan.
Sa lokal nga trabaho, kaeakip sa mga gina-usoy ro mga customer service representative, technical support representative, Human Resource specialists, sales marking representatives, salesman, driver, marketing assistant, secretaries, company guards, ag iban pa.
Samtang, ro mga job seekers man halin sa mga probinsiya it Aklan, Antique, Capiz, ag Guimaras hay ginabaton nga mag-intra.
Bukod sa job fair, magahimo man ro DOLE it pagbabakuna kaibahan ro Iloilo City government.
Target it DOLE-6 nga mabakunahan ro 1,500 indibidwal./JIL B. LACSON
