Nalabwan na sa Davao City ang mga dagkong lugar sa Metro Manila ug uban pang dapit sa nasud sa dunay pinakadaghang natalang kaso sa Covid-19.
Subay kini sa report sa OCTA Research Group gikan June 21-27 kung asa, natala ang 263 nga daily average cases sa Davao City.
Dugang sa OCTA, tungod niini anaa sa 93% ang pagtaas sa utilization rate sa Davao City sa intensive care unit o ICU nga maoy pinakataas sukad nagsugod ang pandemiya sa COVID-19.
Miabot na usab sa 70% ang hospital bed utilization rate sa syduad nga nagsunod sa Tacloban, Leyte nga dunay 88% critical rate.
Kahibaluang base sa Southern Philippines Medical Center – Official COVID-19 Daily Statistics ug Utilization Rate as of June 30, 2021, syento por syento na ang ulitization rate o nagamit na ang 92 ka Intensive Care Unit beds.
Gawas niini wala na usab bakante ang 361 ka mga COVID-19 ward beds sa pasilidad hinungdan nga ubay-ubay ka mga pasyente ang naghulat aron mabalhin.
Una nang giangkon ni Dr. Maria Yvette Barez , labaw sa Infection Control and Prevention Unit sa SPMC nga daghan pa ang mga nakalinyang pasyente nga naghulat mabalhin sa ICU beds samtang ang ubang pasyente nga dili grabe ang gipagbalhin sa bag-ong gimuntar nga pasilidad sa gym sa SPMC-Institute of Psychiatry and Behavioral Medicine. BNFM-DAVAO
