LEGAZPI CITY – Nagkondusir na nin kaenot-enoteng pag-orolay an Daraga-Camalig Technical Working Group (DCTWG) manungod sa nominasyon kan Bulkang Mayon sa United Nations Educational, Scientific and Cultural Organization (UNESCO) World Heritage status.
Obheto kaining maiparaam sa lokal na gobyerno nin Camalig asin Daraga kun ano saindang magiging parte sa pag-abante sa nominasyon.
Pig-orden naman ni PTCAO Head Dorothy Colle an duwang LGU na magtao nin manlain-laing dokumentos na masuporta sa pagbilog nin management plan siring kan mga historical data and figure, polisya, resolusyon asin iba pa.
Mientrastanto, dapat na an mga isusumiter mapahiling kun ano an nagpapa-unique sa bulkan kasarabay na an mga positibong epekto kaini sa kapalibutan na mapakusog sa posibilidad na madeklarar na saro sa mga World Heritage Sites kan UNESCO.
Presente sa pag-orolay si Mayor Awin Baldo kan Daraga, pati na an mga perosnahes kan Municipal Tourism and Cultural Affairs Office, mga miyembro kan DCWTG, Parish Pastoral Council, mga representante kan Roman Catholic Bishop of Legazpi Inc., representante ni Mayor Caloy Baldo kan Camalig, Camalig Municipal Tourism and Cultural Heritage Office asin Municipal Planning and Development Officer kan Daraga.
