Sa pagselebrar it paskwa, ginpahanumduman it Bangko Sentral ng Pilipinas (BSP) ro publiko nga maghaeong sa mga transaksyon sa mga bangko kapin nga sa mga automated teller machines (ATM).
Base kay Lowen Andrew Ligad, bank officer II it BSP Iloilo, ro pag-release it mga bonus, 13th month pay, ag iban pa nga mga benepisyo sa pribado ag pampubliko nga empleyado ro maging rason sa mas maabong mga transaksyon sa bangko.
Bangud dikara, dapat siguraduhon it publiko nga mauewas andang palibot kung sanda hay makipag-transaksyon sa ATM.
Dapat maghaeong man ro mga kliyente sa mga kaduda-duda nga device nga ginakabit sa mga ATM booths nga pwedeng kopyahon ro mga importante nga impormasyon kapareho it mga pin number.
Ginkumbinse man ni Ligad nga mag- online banking bangud mas safe raya.
Sa ginaasahan nga pagtaas it sirkulasyon it kwarta sa makarang buean, ginsigurado ni Ligad nga may ensakto nga suplay it mga banknotes./JIL B. LACSON
