-Andy T. Galve
KABANKALAN CITY, Negros Occidental — Nagakatol sa karun ang ulo sang mga katapo sang City Traffic Management Office (CTRAMO) sang Kabankalan, bangud kulang ang ila mga ‘protective gears’ parihas sang botas kag raincoats, sa tion nga sila kinahangalan mag responde sa mga aksidente nga maga-luntad sa tig-ululan.
Sa interview sang Brigada News FM-Kabankalan kay Christino Bandico, tigpamuno sang CTRAMO, kun mag-abot ang tion nga mag-sige na ang tig-ululan, mabudlayan ang mga katapo sang iya opisina nga mag responde sa mga aksidente kag magpatigayon sang hugot nga bantay trapiko, bangod sa kakulang sang proteksyon sa ila lawas batok sa ulan.
Dugang pa ni Bandico nga kun estoryahan ang kadasigon sa pag-responde, kaya sang iya opisina, bangud wala na sang klase kag indi na tanto ka gutok ang dalanon, apang kun kulang ang ila proteksyon, maapektuhan man sila giyapon.
Nagapahanumdom naman ini sa mga motorista ilabi na sa magalagaw sa mga tourist spots sa syudad kaparehas sang Mag-aso falls nga sikyaron gid ang salakyan nga wala sang problema kag likawan nga magmaneho kung nakainom sang makahulubog nga ilimnon.
Sa piyak nga bahin, madumduman nga sang tinalikdan nga tuig, naga-reklamo man ang CTRAMO bangud sa gina-alegar kulang nga traffic enforcers sa syudad.*
