-Reymund Titong
KABANKALAN CITY, Negros Occidental — Patay ang 31-anyos nga pulis matapos gin-luthang sang kapareho man nga pulis sa Barangay Tangub, syudad sang Bacolod, las-5 sang hapon, Mayo 31.
Ginkilala ang biktima kay Police Staff Sergeant Jotham C. Arremtuto, kasado, na-assign sa Bacolod City Police Office (BCPO), kag residente sang Crossing Agustin, Barangay Paraiso, syudad sang Sagay, sa norte nga bahin sang Negros Occidental.
Samtang, ang suspetsado naman ang ginkilala kay Patrolman Alvin Rios, 26-anyos, wala asawa, isa man ka pulis nga na-assign sa Iloilo Provincial Police Office, kag residente sang Barangay Bugnay, Valderama, probinsya sang Antique.
Sa imbestigasyon sang kapulisan, ang biktima ang yara sa sulod sang balay sang iya live-in partner nga anay live-in partner man sang suspetsado kag apisar nga bulagay na ang mga ini, nagabisita man sa giyapon ang suspetsado bangud may yara ini sila sang anom ka bulan nga bata.
Apang samtang nagapahuway ang biktima kaupod ang live-in partner sini, nag-abot ang suspetsado kag nakita niya nga updanay ang duwa sa sulod sang kwarto sang ila puluy-an. Bangud sang nakita, gin-kuha sang suspetsado ang iya caliber 9MM nga service firearm kag gin-luthang ang biktima sang makaduwa ka beses. Nahibaluan man nga ang puluy-an ang gina panag-iyahan man sang suspetsado kag iya anay live-in partner.
Ginhingagaw pa nga dal-on sa hospital ang biktima apang gindeklarar na ini nga dead on arrival. Sa karun, yara na sa paghinakop sang Bacolod City Police Station 8 ang suspetsado para sa nagakaigo nga disposisyon kaupod ang anay live-in partner sini, samtang nagapadayon pa ang imbestigasyon sang kapulisan.*
