BICOL – KASABAY kan pormal na pagpupuon kan Fire Prevention Month ngunyan na Marso, liwat naghiras an Bureau of Fire Protection o BFP-Bicol nin mga tips para makaibitar sa kasulo urog na ngunyan na panahon nin pandemya.
Segun ki FINSP Liezel C. Lo, tagapagtaram kan BFP-Bicol, importante na masierto na salbado an kada harong sa nin huli ta kadaklan umano sa mga insidente nin kasulo an nairerehistro sa mga residential areas.
Pagiromdom kaini sa publiko, dapat na siertohon na bako overloaded an mga circuits o saksakan asin dai maiwalat na unattended an mga light sources siring kan kandila, gasera asin iba pa.
Dapat man soboot na regular na i-check an mga tanke nin gas kun igwang leak o tagas, pakarayon an mga sala-salapid na connections asin salidahan an mga faulty wirings na iyo soboot saro sa pangenot na pigigikanan nin kasulo.
Dugang pa kaini, dapat na isa-isip kan lambang saro na bako sana an kabuhayan o propriedades an pwediser na maabo sa kasulo kundi peligroso man sa buhay nin tawo.
Mantang bilang parte man kan selebrasyon ngunyan na bulan, laomon soboot kan publiko an man iba ibang aktibidad na pigpreparar kan BFP siring kan mga radio program asin pagpapadagos kan saindang Oplan Ligtas Pamayanan asin paglilibot sa mga komunidad para magtaong pagiromdom sa mga residente.
Sa huri, liwat hinagad kan ahensya an bilog na suporta asin kooperasyon kan publiko tanganing masierto na salbado sa kasulo an lambang saro urog ngunyan na nagpapadagos pa man giraray an huma kan pandemya.
Tema kan pagcelebrar kan Fire Prevention Month ngunyan na tao iyo an “Sa pag-iwas sa sunog, hindi ka nag-iisa.”
