Paslak na sa bilangguan ang suspek nga mipusil sa iyang ugangan sa Purok Quary, Brgy Megkawayan, Calinan Dist., Davao City alas- 7:00 sa gabii niadtong Agosto 1 tuig kasamtangan.
Sa imbestigasyon sa Calinan Police Station, nagkalalis ang suspek nga nailang si Jesryl Lavador Zabate, 35 anyos ug ang biktima nga si Brenda Bragat Butaya, 52 anyos nga susamang nanimuyo sa nasangpit nga lugar.
Kalit na lamang nga mibunlot ang suspek sa iyang armas og walay daghang pangutana gipusil ang iyang ugangan tumong likod sa ulo niini.
Daling gidala sa Southern Philippines Medical Clinic (SPMC) ang biktima nga karon padayon pang giobserbahan sa mga doktor.
Misulay pa sa pagsibat ang suspek apan gumikan sa gilusad nga hot pursuit operation, dakpan ang nahisgutan.
Nasayran nga bangi sa pamilya ang gitudlong motibo sa nasangpit nga pagpamusil.
