LEGAZPI CITY – Target kan Albay Public Safety and Emergency Management Office (APSEMO) na magsagibo nin tree pruning asin line clearing sa banwaan kan Malilipot asin siyudad kan Tabaco orog na sa mga lugar na sakop kan feeder 3 ngunyan na semana.
Ang lakbang na ini parte kan preparasyon kan gobyerno-probinsyal parac sa posibleng paglaog kan mga bagyo sa Bicol.
Segun kay APSEMO Head Dr. Cedric Daep, dakulang tabang ini orog na ta nakakaeksperyensyar an probinsya nin mga mararaot na panahon kun sain an mga sanga kan mga kahoy, nakakaapektar sa mga linya kan kuryente.
An aktibidad na ini taun-taon nang pigsasagibo kan opisina katabang an manlaen-laen na mga opisina siring kan Albay Electric Cooperative (ALECO), Provincial Engineering Office (PEO), Department of Environment and Natural Resources asin Department of Public Works and Highways (DPWH).