GI-ARESTO sa kapulisan sa Makar Police Station ang usa ka amahan human manglugos sa iyang menor de edad nga anak.
Alas 8 sa buntag, Lunes , dali nga mipatala sa mga otoridad si Hazel kuyog ang iyang manghod nga maoy biktima sa pagpanglugos, wala matud pa masayod ang ilang amahan nga giila kay alyas Demo, 43- anyos, tricycle driver, taga Brgy Apopong, nga gipatala siya ngadto sa kapulisan tungod kay sayo kini milakaw aron mamasahero.
Gisaysay ni Hazel ang igsoon sa biktima, pauli na matud pa sila ngadto sa Glan, Sarangani Province dihang kalit nga naghilak ang iyang manghod tungod kay gusto kining muuban kaniya, nakamatikod matud pa si Hazel nga gahinuktok ang iyang manghod, ug dihang gipangutana didto na kini mitug-an sa tinood.
Gibutyag sa biktima nga dugay na siyang ginahilabtan sa iyang amahan, sukad nga nag edad pa siyag 10-anyos hantod karon, apan nahadlok kini nga musumbong tungod ginataparan matud pa siya og kutsilyo dihang matulog ug ginabaaran siya saiyang amahan.
Dugang pa niini, ang biktima ug iyang amahan, sila lang matud pa duha ang nagpuyo sa ilang panimalay tungod kay bulag na kini sa ilang inahan.Nadakpan ang suspetsado alas 4 ang takna sa hapon sa Buayan checkpoint, ug kasamtangan nga gitanggong sa Makar Police station. ( Enamie Mogpon)
